المؤيد بتأييد اللّه الملك المستعان و الموفّق بتوفيق العزيز المنّان ، شهنشاه گيتى ستان دولتلو و سعادتلو و عظمتلو و شوكتلو پادشاهمز ، اعز اللّه انصاره و ضاعف اقتداره ، حضرت لرينك كه نباهت شأن و علو مكان ده سائر سلاطين پيشين دن گوى مسابقتى ربوده و جباه قياصرهء زمان خاك آستان سعادت آشيان لرنده سوده در . آستان دوستان نواز و عتبهء عدو گداز لرينه ايلچيلك طريقيله بر نامدار وزيرين كوندروب ايكى كره يوز بيك التونلق نقد و يادگار پيشكش ارسال ايليوب . مشار اليه سعادتلو صدر اعظم حضرت لرى مقدما روم ايلى طرفنده سردار اكرم ايكن ما بينده قول و قرار ايتدكلرى منوال اوزره صلح و صلاحك قبول اولنمسى با بنده عرض تضرع و ابتهال و كماكان خراج معتادلرى ادا سنده امتثال فرمان لازم الاجلال ايتمكله رجالرى دوستلق و محبت عرض ايدنلره قارشو دائما مفتوح و گشاده و انجام مرام دوستداران ايچون هميشه بر پاستاده اولان باب سعادت مآب لرنده عز قبوله قرين و شرف اجابته رهين اولوب نام و ناموس سلطنت لرينه لايق و آباء و اجداد عظام لرينك آيين و اسلوبنه موافق و شرع شريف نبوى يه مطابق اولان قيود و شروط معتبره و عهود و ايمان مقرره ايله عهدنامهء همايون احسان اولنوب كلان ايلچيسى انواع رعايت و عنايت پادشاهى ايله مفتخر و مباهى قيلنديغندن صكره ماه شعبان المعظمك التنجى گوننده سدهء سعادت دن كير و مشار اليه قرال طرفنه روانه قيلنمشدراندن ماعدا قديم الايام دن بو - خاندان ابد پيمانك زير سايهء حمايتنده آسوده و مستظل و دائما بو دولت عليه خير خواه لريله يك جهت و يك دل اولان اردل و افلاق و بغدان و يوده لرى و عموما او سمت لرده اولان مجار طائفه‌سى حاكم لرى براز مدت دنبرو روى اطاعت لرين سمت آستان سعادت آشياندن منحرف و عنان متابعتلرين طريق آخره منعطف قيلمشلر ايكن . حاليا تخت و دولت خداداد شهريارى قوتى و ساعد اقبال اجلال خداوندگارى معاضدتى ايله آباء و اجداد عظام لرى زماننده ايتدكلرى حسن اطاعت و انقياددن زياده اظهار متابعت و عرض مسكنت ايدوب كما كان جهت توجه واردات - لرين در دولت خداوندگارى سمتنه راست و مقدما صادر اولان سهو و قصور لرينك